G A G U R I T A N

P A C A R U A N

OLEH

IR. PUTU JANUAR ARDHANA

DENPASAR

2008-04-02

G A G U R I T A N

P E C A R U A N

OM SWASTI ASTU

I.     GINADA

1.  Kakawitin Kapertama

Pangrastitine Tan Sipi

Majeng Ida Hyang Wisesa

Ledang Ugi Ngicen Astu

Sarwa Bawa Sarwa Loktah 

Nunas Sisip

Mangde Tan Kacakra Bawa

2. Sri Wawuh Langit Kacrita

Ida Dewi Madhumali

Maka Parab Rabin Ida

Mangentosin Dados Prabu

Madeg Ring  Medangkemulan

Rikalaning

Sri Kulapati Wus Mangkat

3.  Yan Sampun Makudang Warsa

Ngambel Jagat Dahat Trepti

Ring  Jagat Medang Kemulan

Maka Kalih Taler Mantuk

Kagentos  Putra Uttama

Warna Pekik

Bagus Alep  Tur Widagda

II.   SINOM

1.    Pangrawuh Sang Citraratha      

       Bhawari Loka Nagari

       Istri Ayu Mangiringang

       Puspatan Ida  Sang Kyati

       Sujatin Ida Puniki

Pragayan  Gandarwi Agung

Sareng Raja Kejangkepang 

Sri Bhatatipati Pekik

Ratu Wibuh

Panrestian Sang Kesawa  

2.           Rikala Warsa Punika

Warsa Magentos Tumuli

Saking  Krete Nuju Treta

Para Swata Katedunin

Rsi Sorgawi Utamaning

Tan Lali Pendeta Wiku

Rsi Sorgawi Sapisanan

Wiku Siddhayoga Malih

Ida Metu

Saking  Cahya Sanghyang Homa

3.    Keadegang Bagawanta

Ida Patut Kasungkemin

Pinaka Guru Utama

Ida Sri Bhatatipati

Sami Ngandap Matur Bakti

Sajebag Prabu Tan Purun

Pinaka Pamuncuk Jagat

Maring Panegara Jawi

Risampun  Mur

Kagentos Putra  Utama

4.    Putran Ida Mapesengan  

Ida Sang Prabu Sri Taki

Panrestian Sanghyang Indra

Jaga Nabdab Raja Niti

Ngadegang Rakryan Apatih

Demang  Anglurah Tumenggung

Manca Saha Pangalasan   

Tanda Miwah Angabehi

Ramabahu

Ramatantu Ramapunta

III.  DURMA

1.    Caritayang Ida Bhatari Sri Kocap

Sedeng Rangdu Ida Mangkin

Tedun Nuju  Bumi Jawa

Alas  Tanjung Maka Genah      

Digelis Magentos Warni

Masiluman

Rare Cilli Ngaran Mangkin

2.    Rare Cilli Nenten  Madrebe Rerama  

Lekade Ring  Dusun Tani

Listuhayu Tan Kepangpang

Nenten  Uning  Ring Kawitan  

Napi Malih Nora Mami

Mahawinan

Kasengguh  Putra Bhatari

3.    Rare Cilli  Digelis  Kebakta Budal

Kedandan Sang Manuharing

Wantah Istri  Si Kabayan

Jadma Bekung Tanpa Putra

Nenten  Maduwe Sentani

Si Kabayan

Wangsa Wesya Maka Kawit

4.    Si Kabayan Manahnyane Dahat Ledang

Ngamolihang Rare Istri

Kepayasin Serahina

Antuk Mas  Mirah Sasocan  

Tan Prasida Menyacadin

Kadi Jadma

Polih  Nawaratna Manik

5.    Makudang Warsa I Rare Sampun Bajang

Kawastanin Sri Wini Kasih

Warnane Tanpa Tandingan

Sekadi Dewi Samudra

Wicaksana Dahat Ririh

Maka Pahala

Welas Asih Sangyang Widhi

IV.  PANGKUR

1.    Ngiring Mangkin Caritayang

Kawentenan Hyang Bhatari Uma Dewi

       Manyusup Ring  Alas Gunung 

Nilarin Genah Metapa     

Jaga Manyujur Ke Gunung Maha Meru

Parikedeh Makta Manah

Matemu  Hyang Siwa Murti

2.    Tan Dumade Hyang  Kumara

Rawuh Matur Ring Bhatara Uma Dewi  

Nakenang  Genah Hyang Guru 

Nyawis  Malih  Dewi Uma  

Napi Tujon  Dewa Cucud  Jaga Ngetut

Ida Hyang Siwa Baruna

Rikala Ida  Magedi

3.    Hyang  Kumara Nyawis Banban

       Mapikayun Jaga Mangaturang Bakti

Pinakaning  Tangtetebus  

Dosa Sarira Kret Nama

Hutang  Pianak Majeng Bhatara Guru

Ageng Tan Sida Wilangan

Jagat Tiga Kaebekin

4.    Manyawis Bhatari Uma

       Ida Bhatara Kumara Kejagjagin

Ngujang Ngabe Keneh  Ngacuh

Keneh  Dewa Sampun Singsal

Kudang Warsa  Meme Metapa Ring Gunung        

Nangingke I Dewa Twara

Nenten  Nahanin Nengokin

5.    Bakti  Ring Meme Dohpara

I Dewa Tuara  Nahanin Manengokin

Kuhira Budi Kasengguh

Wireh Tusing Pati Nawang  

Getih Tulang Rambut Daging Kulit Sumsum

Minab Narka

Medal Sakeng Kama Aji  

V.   MASKUMAMBANG

1.    Dewa Tusing Nawang Melahang Natasin

Ketatwan Sad Rasa

Wedar Teken Biang Malih

Apa Sane KArawosang   

2.    Ida Sanghyang  Kumara Gelis Menyawis

Biang Dewi Uma

Adasa Sareng Asiki

Yan Pet Prade Timbang Timbang  

3.    Piutang  I Pianak Majeng I  Aji  

Yan  Tekaning Biang

Wantah Manyelang Pemargi

Nora  Buakan Uttama

VI.  PUCUNG

1.    Manah Bhatari Uma Dahating Bendu  

Majeng Hyang Kumara

Madak Dadi Bhrenggiristri

Nganista Ibu

Bawos Dewa Lintang Pongah

2.    Mai Aba Getih Daging Kulit Ibu

Jani Lakar Tadah

Gelis Dados Durgha Murti

Pati Kacuh

Bhatari Masinganada

3.    Ida Sanghyang  Kumara Gelis Kaplekur  

Ngangge Kuku Kiwa

Sanghyang Kumara Menangis

Sengu Sengu

Kantane  Kacekuk Banat

4.    Getih Ida Sanghyang Kumara  Ketayub

Tangkejut Hyang Siwa  

Hyang Bhatari  Ngregep Malih  

Nengkik Ngrudug

Kadi Krebek Ngebek Jagat  

5.    Ida Sanghyang Nila Kanta  Gelis Rawuh

       Ring Bhatari Durgha

Gelis  Nyapa Manedunin

Manyalimur

Ring Ida Bhatari Uma

6.    I Dewa Twara Nahaning Lara Bingung

Tan Wenten Presida  

Sane Jaga Menyakitin

Dewa Wastu

Apan Dewaning  Dewata

VII. GINANTI

1.    Dewi Durgha Nyawis Ketus

Tiang Bendu Kadi Mangkin

Santukan Putran Titiang

Hyang Kumara Putran Beli

Tan Madruwe Panglokika

Taler Dahat  Tuna Bakti  

2.    Meme  Wantah Margi Agung

Ritatkala Ipun Mijil  

Sanghyang Kumara Mawosang

Awaknyane Tan  Medaging

Isin Basang Sakeng Biang

Nika  Metu Sakit Hati

3.    Bawos Nyane Pati Kacuh

Ipun Taler Ngelampahin

Nenten Patut Nawur  Utang

Sakeng  Biang Ipun Mijil  

Wantah Majeng Ring Bhatara

Sane Patut Kataurin

4.    Mawinan  Purun Mangutgut  

Nagih Rah Daging Tur Kulit

Pinaka Tebus Kama Bang

Sakeng Biang Genah Mijil

Punika Maka Jalaran

Mangde  Sida Tatas Uning

                  

5.    Ngandika Bhatara Guru  

Maduluran Kenyem Manis

Yening Dewa Mawecana

Kadi Sane Pireng Beli

Adi Kasengguh Alpaka

Tuara Uning  Isin Gumi

6.           Bhatara  Brangti  Kalangkung

Mireng  Bawos Kadi Mangkin

Imalu   Bhatara Kala

Jaga Nadah Ngepet Pati

Majeng Ring Sanghyang Kumara       

Sangkaning Titah Bhatari

7.    Bawos Bhatara Yan Ditu

Dumadak Jaga Nepenin  

Dados Bhairawi Durgha

Nadah Tetadahan Sami

Madulur Saking Pratingkah      

Stata Makta Manah Brangti

VIII. SINOM

1.  Tangkejut Bhatari Durgha  

Pastu Hyang Siwa Nibenin  

Hyang Kumara Kalepasang

Tan Rerenan Ida Nangis

Gelis Mangaturang Bakti

Ring  Ajeng Bhatara Guru

Saha  Ngusap Papayasan

Sane Wenten Ring Tungtunging

Mangda Pastu

Sida Gelis Kasomia

2.  Sanghyang Siwa  Dahat Ledang

Nitah Hyang Kumara Gelis

Mangda Teleb Menyantosang

Ngantos Wusan Dados   Bhrenggi

Jaga Ngruwat Hyang Bhatari

Mangda Wusan Durgha Iku

Pengandika Sanghyang Siwa

Hyang Kumara Kanikain  

Ring Mahameru

Goa Kidul Giri Mandara   

3.  Sada Kala  Kacarita

Pageh Makta Kahyun Gilik   

Majeng Pastu Sanghyang Siwa

Hyang  Durgha Magentos Warni

Dados Panca Durgha Murti

Ke Bumi Jawa Menyusup

Nyusupin Sekancan Setra

Mekarya Sekancan Gering

Desti Aneluh   

Ngeleyak Manerangjana  

4.  Ngiring Mangkin Ceritayang  

Ki Kabayan Sareng Istri

Si Manuhari Anama

Polih Nuduk Anak Cenik

Orti  Sampun Kapiragi      

Ida  Batatipati Wus

Mawinan  Mapikayunan

Nuju Medang Tanjung Ugi

Mangeruruh

Genah  Pondok Ki Kabayan

5.  Sang Prabu Gelis Memarga

Kairingang Tanda Mantri

Sampun Rawuh Kacarita

Genah Kabayan Manengil

Ki Kabayan Matur Bakti

Ring Ajeng Ida Sang Prabu

Kahyune Dahat  Garjita

Napimalih Sampun Panggih   

Kapilulut

Listuhayu Kabinawa

IX.    PANGKUR

1.  Putran Ipun  Ki Kabayan

Jegeg Listuhayu Kadi Dewi  Ratih

Kearsayang Ida  Prabu      

Kejatuh Karma  Ring Putra         

Sang Kramakala Putran Ida Kapungkus

Si Kabayan Tan  Manolak

Titah Prabu Kasungkemin

2.  Sang Batatipati Ledang     

Ki Kabayan Kapaica Jinah Manik        

Ida Gelis  Budal Nerus      

Makta Putra Ki Kebayan   

Si Manuhari Dahat Ledang Manuntun           

Sami Pada Egar Manah

Tan Kacarita Ring Margi

3.     Ngiring Mangkin Caritayang

Sampun Rawuh Ring Mandala Puri Sami

Digelis Ida Sang Prabu

Ngawentenang  Peparuman

Para Tanda Lan Mantri Sami Kapupul

Mangetelang Pawacana

Nagara Mangda Kesapih

X.      PUCUNG

1.  Wenten Kocap Carita Sane Kepangguh         

Sanghyang Mahadewa       

Ngicen  Manusa Piranti     

Mapawungu

Mangda Dados Tukang Emas

2. Kalaning Nagara Risedek Kalulut

Istri Ayu Raras

Saking Jagat Maya Mijil    

Kasinengguh

Jagat Galuh Kapuspata     

3.  Caritayang Mangkin Indik Sanghyang Guru

Sampun Prayatna    

Indik Tingkah Tata Titi

Ida Dumun               

Ngantos Ida Stata Kroda

4.     Ida Sanghyang Siwa Nenten Kadi Dumun

Mastu  Bhatari Durgha

Dados  Pancadurgha Murti

Dewa Guru

Sampun Yatna Tekeng Angga 

XI. ADRI

1. Sanghyang  Siwa Ngetelang  Pamastu

Maring Dewek Ida

Dados  Kala Ludra Gelis

Sadesa  Desa Manyusup

Genah  Bhatari Karuruh

Irika Tengahing Setre

Bhatari Durgha Malungguh        

Ida Dados Panca Rupa  

Ring Panca Desa Magenah

2. Sri Durgha Maring Purwa Malungguh  

Kaja Raji Durgha

Ida Sane Makukuhin

Suksma Durgha Maring Kawuh

Irika Ida Mapupul

Sami Pikayune Pateh

Mangenyagang Jagat Nerus

Dhari Durgha Ring Daksina        

Dewi Durgha Ring Madia  

XII.   GINADA

1. Gagison Kalaludra

Menyapa Ida Bhatari

Sami Nunas Panugrahan

Pinunase Sami Asung

Ledang Sanghyang Kalaludra

Sami Mangkin  

Dados Siki Sinarengan      

2. Ida Bhatari Sri Durgha      

Mangaripta Yaksa Yaksi

Dengen Kaliku Kalika

Ida  Raji Durgha Kukuh    

Mekarya Bebai  Setan

Wangjin Jukih

Bregali Miwah Bregala      

3. Bhatari Sukami Durgha     

Ngripta Pemala Pemali

Karaswati Karasweta

Saha Mekarya Sampulung

Hyang Bhatari Dhari Durga        

Ngaryanin

Sajer Bhuta Kapiragan

4.  Hyang Bhatari Dewi Durgha       

Ngardi  Panca Maha Buthi

Sekadi Butha Janggitan     

Bhuta Langkir Taler Mumbul

Sinareng Bhuta Taruna     

Tiga Sakti

Miwah Bhuta Lembhukana         

                                     

5. Sapunika Kacarita

Paindik Setra Kepanggih   

Ngraris Kasengin  Pancaka

Seantukan Genah Lungguh         

Hyang Bhatari Pancadurgha       

Kasungkemin

Ardanareswari Nama

6.  Ritatkala  Ring Pempatan

Ida Mesikian Malih

Mangkin Dados Catur Bhuta

Bhuta Punika Kasengguh

Drembamoha  Kala Ngadang

Niki Malih

Kala Katung Kala Wisaya

XIII. DURMA

1. Ritatkala Ring Bale Agung Malingga    

Bhatari Magentos Nami

Kasengin  Kalika Maya

Hyang Bhatara Kala Ludra

Dados Jutisarana Yukti

Pupul Ika

Medal Kala Tiga Sakti

2.     Ida Kairing Olih Sang Bhuta Raja

Kairing Sang Kala Putih

Kala Kuning Kala Abang

Kala Ireng Bhuta Kwanta

Sang Bhuta Pelung Tan Mari

Bhuta Sancara

Bhuta Dadu Bhuta Swat Lwir

3.  Pikayunan Ida  Sanghyang Trisamaya

Dahat Sangsaya Sinami     

Indik Patilar Hyang Siwa  

Sampun Dados Kalaludra 

Warnannya Dahat Nyejehin

Sareng Tiga

Mawosang Hyang Siwa Sakti     

4.  Pamuput Nyane Ida Mekarya Wayang

Kulit Baburon Kaukir

Nulad Warna Sanghyang Siwa 

Saha Para Hyang Dewata

Hyang Kalanucara Ngraris

Ngerawatang

Lawat Warna Hyang Bhatari      

                                               

5.  Carita Mangkin Sampun Mekarya Wayang

Hyang Trisemaya Manyilib  

Ngrereh Genah Sanghyang Siwa

Mangda Wurung Nadah Jadma   

Kalarudra Kacingakin       

Maka Rua

Sareng Ida Hyang Bhatari

6.  Kalarudra Nyamar Dados  Jutisarana

Bhatari Durgha Digelis

Dados Sang Kalika Maya  

Hyang Tri Semaya Prayatna

Ngulati Sri Batatipati                  

Nguningan

Pemargi Hyang Siwa Suci           

         

XIV. SINOM

1. Sri Batatipati Wantah

Prabu Ring Galuh Negari

Katiba Mekarya Yadnya   

Caru Pancasia Ugi

Jangkep Daging Sareng  Getih

Sate Matah Sate Pusut

Sate Asem Lan Carbaka

Malapala Kedagingin

Sane Muput

Ida Sang Maha Pandita

2.  Batatipati Ngawinang

Sane Pinaka Pengawit

Macaru Ring Bumi Jawa

Sang  Prabu  Dahat Sairing

Sangkan   Tri Semaya Iki

Mangda Galuh Tan Kalurug

Antuk Sanghyang Kala Ludra

Caru Pancasia Kerti

Muput Caru

Hyang Begawan Siddhayoga

3.  Wusan  Caru Pancasia

Ring Ajeng Bale Agung Lwir

Ida Sanghyang Trisemaya

Mekarya Panggung Lan Kelir

Manyolahang Wayang Kulit

Sanghyang  Iswara Ngelantur

Dados Jero Dalang Wayang

Sanghyang  Brahma Kalugrain

Lan Hyang Wisnu

Pinaka  Katengkong  Dalang

4.  Gending Pemanjang Pamungkah 

Mwang Tabuh Redep Kecapi

Gulaganti Ring  Panyelag

Lelampahan Yan Kapilih

Antuk Ida Dalang Sakti

Pemargan Bhatara Guru

Ngerereh Bhatara Durgha

Sesolahan Wayang Kulit

Maka Dulur

Pancadurgha Kala Durgha

         

XV.     GINADA

1. Manah Ida Sampun  Somya

Wusan  Nonton Wayang Kulit

Olih  Dalang Hyang Iswara

Bhutakala Wus Pakenyung

Nadah Caru Sami Ledang

Hyang Bhatari

Pada Nyalit Manah Ida

2.  Polih Caru Pancasia

Bhuta Kala Dengen Raris

Sami Kahyune Garjita

Sinami Sampun Mapupul

Mangkin Sampun  Somya Rupa

Maka Titi

Mantra Resi Siddhayoga

3.  Bhuta Kala Kepralina

Budal Maring Sorga  Yukti

Mewali Menados  Siwa

Sanghyang Kalarudra Tuhu

Sareng Hyang Bhatari Durga

Sareng  Abdi

Mewali Ring Siwa Loka

4.   Amunika Mangaturang

Managingin Gita Santi

Gaguritan Caru Yadnya

Ampurayang Kirang Langkung

Sakadi  Cangkah Cumangkah

Parama Santi

Anggen Titiang Nguntatang

Puput  Kepipil, Tanggal 2 April 2008, Pukul 24.20  Wita, Olih Ir. Putu Januar Ardhana, Alamat Banjar Batur Sari Denpasar Timur Bali.