Banjar Batur Sari Kesiman

GAGURITAN

SIRA ARYA GAJAH PARA

BRETARA SIRA ARYA GETAS

OLEH

IR. PUTU JANUAR ARDHANA

DENPASAR

2006-01-23

PAMAHBAH KALIH PANGAKSAMA

Om, Swastyastu

Mejalaran saking manah subakti ring Bhatara Lelangit, titiang pinaka pretisentana Sira Arya Gajah Para, gumanti ngaturang ayah mangdene saluwiring pretisentana uning ring kewibuhan Bhatara Lelangit duking nguni.

Kadudut antuk manah punika, raris titiang mautsaha sakasidan nyurat gaguritan Lalintihan Sira Arya Gajah Para. Majeng ring ida dane sane sampun waged ring indik-indik sastra, tiang mamitang geng rene sinampura, seantukan geguritane punika kantun doh saking becik napimalih sane mewasta lengut. Kawiaktiannya titiang nyurat geguritane punika mangda kewentenan Bhatara Lelangit Sira Arya Gajah Para presida kauningin sekancan pretisentana, utaman ipun olih para Yowana Sentana Sira Arya Gajah Para, seantukan geguritan puniki ngangge bahasa bali

Mogi mogi geguritane punika presida ngewetuang sane becik becik sekancan sentana sane ngewacen.

Matur suksma, Om, Sati Santi Santi, Om…………..

Denpasar, 23 Januari 2006

Anubhagya Sang Anyurat

Ir. Putu Januar Ardhana

Pretisentana Gajah Para

GAGURITAN

“SIRA ARYA GAJAH PARA BRETARA SIRA ARYA GETAS”

Om Swasti Astu

1. Pupuh Sinom Dasar

Kakawitin Kapertama

Pangrastitinĕ Tan Sipi

Majeng Ida Hyang Wisĕsa

Lĕdang Ugi Ngicĕn Sisip

Sarwa Bhawa Maka Sami

Salwiring Becik Lan Dudu

Nunas Iwang Lan Ampura

Mangde Tan Tulah Pamidi

Ngripta Pupuh

Arya Gajah Para Getas

2. Pupuh Sinom Silir

Bali Meagama Tirta

Ring Leluhur Dahat Bakti

Ngawinang Pratisantana

Nĕnten Purun Pacang Jalir

Majeng Bhatara Lelangit

Napi Malih Jaga Bengkung

Majeng Sanggah Pamerajan

Kapangguh Hidup Tan Becik

Nora Tandruh

Tutur Ayu Jadma Wikan

3. Pupuh Sinom Lawe

Sakadi Bhisama Ketah

Sira Lali Ring Lelangit

Utawi Sanggah Marajan

Dados Jadma Nĕnten Becik

Akĕh Gagodan Mamurti

Hidup Mangliwang Mangliwung

Makarya Tan Ngamolihang

Nĕnten Prasida Ngayunin

Makakuwug

Marebat Sadina Dina

4. Pupuh Sinom Payangan

Santanan Sira Gajah Para

Suksma Majeng Pangelingsir

Sampun Lampus Uning Tatwa

Laluhur Pada Urati

Stata Makarya Prasasti

Santananĕ Galang Tuhu

Nĕnten Kapetengan Sastra

Sakadi I Kedis Curik

Kangin Kauh

Ngrereh Genah Masayuban

5. Pupuh Pangkur

Bĕda Muka Sampun Brasta

Rikala Nuju Dauh Tengaing Wengi

Arya Mewali Rumuhun

Bali Tan Wĕnten Nabdabang

Panjak Bali Aga Kapupungan Bingung

Kadi Pitik Tanpa Ina

Tanpa Pacek Kagugonin

6. Pupuh Pangkur

Minab Sampun Kudang Warsa

Sri Kresna Kepakisan Mangkin Kasudi

Madeg Agung Tur Kasungsung

Jenek Linggih Kabiseka

Ring Samprangan Pranah Kangin Bĕdahulu

Pratisentana Brahmana

Wilatikta Majapahit

7. Durma Dasar

Kairingang Watek Pamuncuk Pararya

Sirarya Kutawaringin

Sira Arya Kanuruhan

Arya Kenceng Arya Wangbang

Arya Kapakisan Ugi

Arya Dalancang

Arya Tan Wikan Tumuli

8. Durma Manis

Mangkin Panjak Bali Dwipa Wĕnten Piwal

Tur Nĕnten Kayun Sairing

Ring Sri Kresna Kapakisan

Panjak Bali Sami Menggah

Napi Malih Kalĕr Giri

Purun Tulak

Sami Pada Ngrubĕdain

9. Ginada Dasar

Osek Pikayun Sang Natha

Pararya Sedek Manangkil

Sami Pada Nguningayang

Panjak Bali Pati Kacuh

Ngawi Manah Dadi Erang

Ngusak Asik

Tan Satinut Ring Sang Nata

10. Ginada Manis

Mangde Sida Madegdegan

Pinih Becik Lan Manangkil

Majeng Prabu Wilatikta

Mogi Prasida Mangutus

Satria Tos Mahottama

Ngamucukin

Manabdabang Bali Dwipa

11. Pupuh Sinom Manis

Gĕlis Mangkin Kacarita

Tedung Jagat Majapahit

Ngutus Arya Gajah Para

Arya Getas Manyarengin

Putra Satria Kadiri

Dalem Maneneng Kasumbung

Maneneng Mateges Yoga

Katinggalin Antuk Aji

Mobot Kantun

Mayoga Tengaing Garba

12. Pupuh Sinom Silir

Kacarita Maha Nata

Mawecana Ida Mangkin

Tedung Jagat Wilatikta

Maduluran Kenyem Manis

Nira Nitahang Ke Bali

Wirĕh Gumi Durung Landuh

Apan Sanĕ Imaluan

Mrasidayang Mangetebin

Ketĕl Dawuh

Ida Natha Wilatikta

13. Sinom Lawe

Maha Patih Gajah Mada

Mapitutur Manimpalin

Mangandika Sada Banban

Arya Gajah Para Gelis

Manah Jaga Manampenin

Tan Presida Pacang Bakuh

Arya Getas Mangandika

Pacang SarengManyungkemin

Tur Salunglung

Mangetohin Kapurusan

14. Dangdang Gula

Sira Arya

Eling Ring Putra Sasana Yukti

Mula Mawit

Tereh Wangsa Kawistara

Tos Kadiri Mahottama

Embas Saking Wangsa Sadu

Jaya Katong Prabu Luwih

Kalaning Nindih Sang Nata

Jaga Piwal Nenten Purun

Napi Malih Jaga Tulak

Mangadegang

Bisama Bhatara Lelangit

Subakti Ring Ida Nata

15. Dangdang

Kacarita

Sanĕ Mangkin Sampun Mataki Taki

Sami Sregep

Bala Yuda Wilatikta

Sira Arya Gajah Para

Sire Arya Getas Tuhu

Ngaturang Sembah Tan Lali

Pula Pali Sampun Purna

Ngadeg Tur Gelis Lumaku

Mangdane Nĕnten Kasĕpan

Sira Arya

Kakalih Gelis Mamargi

Gagencangan Tan Rĕrĕnan

16. Ginanti

Pasih Linggah Sampun Langkung

Tur Malabuh Ring Polaki

Ngojog Sawitra Utama

Gusti Bandĕsa Polaki

Saterehing Bandĕsa Mas

Manah Kadi Kasekarin

17. Ginanti

Bĕnjang Semeng Kantun Lamur

Pada Saling Pamaluin

Pamarginĕ Mangĕncolang

Katah Dĕsa Kalintangin

Abing Tegeh Mangelintang

Tur Mamargi Beneng Kangin

18. Samaradahana

Natar Puri Sampun Panggih

Sampun Prapta Ring Bancingah

Tatamanan Jimbar Lomlom

Kadi Sasolahan Rejang

Elag Elog Magĕlohan

Nedeng Kembang Sekar Ungu

Punyan Gadung Nyurambiah

19. Semaradahana

Gelung Kori Mangangobin

Maparengge Karang Boma

Madaging Dwapara Karo

Minakadi Sanghyang Kala

Karang Gowak Kabinawa

Maring Natar Adhi Luhung

Anggĕn Genah Lilacita

20. Adri

Kabinawa Pamerajan Agung

Pamedalnya Maring Tawang

Mangungkulin Tegeh Ngalik

Pranah Kaja Wĕnten Mĕru

Dahat Asri Merahab Duk

Ring Jerowan Gedong Bĕtĕl

Natar Resik Nudut Kayun

Kembang Tangi Naga Puspa

Angob Sakancan Manyingak

21. Pucung

Nenten Suwĕ Sira Pararya Malungguh

Mijil Ida Nata

Panyingakan Nyunyur Manis

Wastra Luhung

Bawos Teges Mawibawa

22. Ginada Eman-Eman

Pinaka Murdaning Jagat

Manira Jani Nibĕnin

Mangdanĕ Nyelem Putihang

Maring Kalĕr Gunung Agung

Panjak Sami Manyantosang

Sida Ngĕtangin

Manira Manyukserahang

23. Ginada Basur

Manira Mangkin Mawarah

Di Tianyar Gumi Sripit

Mula Kĕweh Mangundukang

Panjak Akĕh Durung Manut

Twara Ada Mangitungang

Duk Ing Nguni

Ring Tianyar Madurgama

24. Maskumambang

Matur Sembah Majeng Ida Nata Raris

Ring Dwara Magenah

Swecan Kadi Ratu Mangkin

Mangda Nerus Ngamolihang

25. Durma Wayah

Dwaning Manah Tatan Kenĕng Lipurang

Pacang Ngawi Mangda Becik

Anggĕn Tiang Nglipur Manah

Kadi Gering Lawas Palas

Wirang Ruwang Jroning Ati

Janten Pacang

Ngruwat Manah Sungkan Gering

26. Durma Lawe

Ampura Banget Pratisentana Tuna

Rawuh Iriki Mangurit

Prasida Nyaratang Nyurat

Gurit Gajah Para Getas

Boya Mamanah Nasikin

Ring Santana

Uning Sastra Gama Sami

“OM SANTHI, SANTHI, SANTI, OM”

Puput Sinurat oleh Ir. Putu Januar Ardhana, Tanggal 6 Januari 2006, Pukul 05.00 Wita, Di Banjar Batur Sari Desa Kesiman Kertalangu, Denpasar Timur Propinsi Bali, Sambil Ngempu Cucu Pertama Penulis, Gede Parawangsa Diningrat

Gede Parawangsa Diningrat

Om, Santi, Santi, Santi, Om