G A G U R I T A N

BRAHMANA KELING

OM SWASTI ASTU

I.     SINOM

1.    Pinake Anggen Panyelag

Mekarya Gurit Puniki

Ring Sameton Ngatur Ayah  

Antuk Tambet Ngalintangin

Kasilibang Antuk Gending

Kadi Pantun Keni Blabur

Padalingsa Tuna Lintang

Paribasa Bolak Balik

Nenten Manut

Ugering Pasang Aksara

2.    Wenten Kocapan Brahmana

Saking Jambu Dwipa Nguni

Mangasraya Ring  Kalingga

Sarahina Mangastuti  

Sanghyang Bajra Sata Yukti

Santukan  Rebat Sumelur

Nibenin Jagat Kalingga

Ring Giri Bromo Mangalih

Gelis  Mararud

Ninggalin Jagat Kalingga

3.    Ida Manggehang Sasana

Tatwa Sanghyang Sakya Muni

Kadibya Papasih Sira

Kaloktah Brahmana Keling

Ngidep Nangun  Tapa Malih

Magenah Ring Alas Gunung

Tan Winingan Sada Kala

Kancit Sang Brahmana Keling

Polih  Pituduh

Japa Wisesa  Wak Bajra

4.    Ri Sedek Kretasamaya

Hyang Utapana Mawisik

Wit Giri Bromo Masabda

Manitah Brahmana Keling

Mangdane  Mataki Taki

Gelis Lumampah Manuju

Pajagatan Bali Dwipa

Ring Bali Kamranan Bumi

Mapatulung

Majeng Dalem Enggong  Nata

 

5.    Sesampun Mireng Pawarah

Ida Batara Hyang Giri

Digelis Sira Lumampah

Mangalih Mandala Bali

Sasampun  Brahmana Keling

Napak Lemah Bali Kawuh

Nerus  Nyusup  Bali Tengah

Markandeya Katinutin

Sane Dumun

Jaga  Nembus  Alas Wayah  

II.   DURMA

1.    Kancit Brahmana Keling Sampun Manapak

Praja Mandala Gelgel Puri

Tan Katemu Raja Nata

Dalem Waturenggong Kocap

Mairingan Para Mantri

Manabdabang

Yadnya Ring  Pura Basakih

2.    Sawetaning Dalem Pacang Mangaryanang

Karya Nangluk Mrana Bumi

Kehananing  Bali Dwipa

Risedek Kakeneng Mrana

Sawah Tegal Sawateking

Sami Brasta  

Mrana Bumi Sedek Mamurti

3.    Sakancan  Tumuwuh Pada Geseng Punah

Sasab Grubug Manumbuhin

Nenten Mrasidayang Waras

Sakancan Tamba Usada

Para Jana Lara Pati

Sapunika

Wentene Ring Jagat Bali

4.    Santukan Nenten Katemu Raja Nata

Ring Praja Mandala Puri

Sweca Pura Sepi Pisan

Brahmana Keling Ngadebras

Ngencolang Ida Mamargi

Sira Lumampah

Manuju Pura Basakih

III. GINADA

1.    Kacarita Sang Brahmana

Rawuh Ring  Pura Basakih

Angob Ida Manyingak

Panjake Pada Pagrudug

Sami Pada Mangetangang

Ledang Ugi

Lascarya Pada Mangayah

  

2.    Mamargi Sira Brahmana

Mangda Pamidara Ngaturin

Majeng  Ida Raja Nata

Wenten Sanak Ira Rawuh

Dateng Saking Jawa Dwipa

Brahmana Keling

Puspatan Ida  Kaloktah

3.    Sesampun Para Pamidara

Mirengang Brahmana Keling

Sami Gageson Srantaban

Jaga Ngaturang Pawungu

Majeng Ida Dalem  Nata

Rinangen Ugi

Sira Dalem Mangandika

4.    Ngutus Sira Patih Moda

Mangda Gelis Nureksain

Sigra Patih Moda Nyingak

Tan Kepangpangan Tangkejut

Manyingakin Sang Brahmana

Kumel Dekil

Kawentenan Sang Brahmana

IV. PANGKUR

1.    Inguh Dane Patih Moda

Manyingak Kawentenan Brahmana Keling

Digelis  Dane Umatur

Majeng  Dalem Enggong Nata

Patih Moda Matur BanbanTur Manyengguh

Kadatengan Jadma Edan

Dalem Waturenggong Brangti

2.    Kesyab Sri Dalem Mirengang

Wenten Mangaku Brahmana  Nanging  Dekil

Jadma Edan Tiwas Lusuh

Eling Tatwa Nangun Yadnya

Tan Wenang Katampak Dening Jadma Buduh

Cuntaka  Yadnya Punika

Yadnya Nenten Mangastuti

3.    Dalem Nitah Bahudanda

Mangda Digelis Ngulah Brahmana Keling

Rakrian Patih Manundung

Sang Brahmana Katuludang

Mina Kadi Mangulahang   Asu Berung

Sapunika Kocap Tingkah

Patih Moda Duk Puniki

4.    Ida Brahmana  Matilar

Gagesonan Ninggalin Pura Basakih

Malarapan Manah Gaduh

Katibenin  Wak Parusia

Brahmantia Idep Brahmana Tan Karungu

Gelis  Ngamaranin Genah

Geneya Saking Basakih

V.   MASKUMAMBANG

1.    Sampun Rawuh Ring Jagat Bandana Ukir

Genah Masanekan

Pucak Sari Kawastanin

Dahat Asri Lumlum Jimbar

2.    Premangkin Ida Ngelar Yoga Samadi

Ngundang Sarwa Buta

Mangda Daging Yadnya Sami

Berek Bengu Tanpa Guna

3.    Kacarita Pangayah  Pada Ajerih

Ngadek  Daging Yadnya

Samandala Mebo Pengit

Kadi Bahu Watang Matah

 

4.    Mapikayun Ida Dalem Mangastuti

Minta Kasih Ida

Majeng Yajamana Puri

Ring Ida Danghyang Nirarta

VI.  ADRI

1.    Ida Danghyang Nirarta Manuwur

Tedun Wangsit Dewa

Wenten Cihna Kapanggih

Ida Dalem Polih Pastu

Nundung Jadma Suci Rawuh

Kasengguhang Kedi Reke

Brahmana Keling Kapungkus

Jadma  Kantun Sakawitan 

Ida Dalem Miwah Danghyang

2.    Ngadegang Kapaksan  Budha Tuhu

Brahmana Kalingga

Patut Dalem Manangkilin

Tuta Pamargan Ida  Dumun

Sinah  Prasida Rahayu

Sinamian Buta Butine

Wusan Manyengkala Nerus

Karya Yadnya Ngamolihang

Prasida Memargi Antar

  

3.    Pewarah Danghyang Nirarta Puput

Dalem Mangandika

Nganikain Para Mantri

Brahmana Keling  Kaetut

Mangda Prasida Katemu

Wenten Besen  Dalem Ketel 

Ring Dija Sida Kacunduk

Ngaturang Sisip Lan Klesa

Utusan Pada Pranata

4.    Sampun Ida Kangkenin Sadulu

Antuk Ida Nata

Ledang  Ida Katangkilin

Brahmana Keling  Katuwur

Ring Basakih Mangda Muput

Karya Panangluk Mranane

Mangda Jagat Bali Landuh

Papareng Nguncarang Puja  

Nyarengin Danghyang Nilarta 

VII. GINANTI

1.    Wusan Para Mantri  Matur

Ring Ida Brahmana Keling

Wenten Paketel Pawarah

Jantosang  Bapa Mangaji

Tirta Sakti Panguripan

Sidamahan  Kahayonin

2.    Brahmana Keling Manerus

Mangambil Tatekan Sakti

Ring Pratiwi Katuwekang

Premangkin Medal Toya Ning

Saking Slagan  Batune Muncrat

Driki Raris Keasreni

3.    Sesampun Prasida Puput

Irika Ida Brahmana Keling

Tur Mekarya  Gegaduhan

Sane Ketah Kewastanin

Kasukertan Jagat Ngaran

Tirta Pingit Dahat Suci

4.    Kapaica Para Hulu

Kapundut  Maring  Basakih

Mangda Gelis Katibakang

Janten  Yadnya Jaga Trepti

Tirta Punika Jalaran

Amreta Agung Kawastanin

VIII. PUCUNG

1.    Benjang Pungkur Yaning  Hana Karya Agung

Maring Bali lemah

Wenang Nuwur Tirta Sakti

Amreta Agung

Mangda Yadnya Sida Karya

2.    Tirta Sida Karya  Mangaran Kapungkur

Wawengkon Jagat Punika

Kawastanin Gunung Sari

Elingang Sungsung

Yan Lempas Manemu Baya

IX. DANGDANG

1.    Kancit Sapaninggal Para Mantri

Saking  Mandala Ukir Wandana

Brahmana Keling Manewek

Manerawang Mireng Pungkus

Danghyang Nilarta Puniki

Meling Kawit Ida Tunggal

Siwa  Buda Siki Tuhu

Punika Sane Ngawinang

Jagat Puniki Maka Genah Malinggih

Siwa Maka Lawan  Buda

2.    Punika Mawinan Pecak Mangkin

Nyabran Hana Karya Mautama

Ring Jagat Bali Dwipane

Wenang  Mangdane Kapuput

Wiku Siwa Budha Yukti

Paragayan Bajrangkara

Ring Brahmana Keling Dumun

Ngaji Tirta Panguripan

Genahe Punika  Mangkin Kewastanin

Sumur Sidha Yatra Kocap

X.   SAMARADAHANA

1.    Sampun Ring Pura Basakih

Ngadeg Karya Nangluk Mrana

Sarwa Mranane Macepol

Sarwa Buron Egar Manah

Jadma Pada Nemu Waras

Sarwa Tumuwuh Malanduh

Sapunika  Kacarita

2.    Ida Dalem Minta Kasih

Majeng Brahmana Kalingga

Mangda Ida Nenten Kapok

Kahanggehang Purohita

Maring Praja Swecapura

Brahmana Keling Sumahur

Nenten Pisan Jaga Arsa

3.    Paindik  Brahmana Keling

Ngemaranin Bali Lemah

Sangkeng Pucak Gunung Bromo

Polih Pituduh Batara

Ida Sanghyang Utasana

Mawinan Pacang Manerus

Mawali Kajagat Jawa

4.    Pawarah Brahmana Keling

Katibeng Ring Ida Nata

Mangdane Gelis Masadok

Majeng Jana  Bali Dwipa

Yan Nangun Karya Utama

Sampunang Lali Manuwur

Tirta Panglepasan Mrana

XI. DURMA

1.     Tatkala Manuwur  Brahmana Kelingga

Mangrayoni Ring  Basakih

Masareng Danghyang Nilarta

Suka Prayojanan Nira

Sidemahan Kaparabin

Mahawinan

Sidemen Yan Kawastanin

2.     Sesampun Ida Keangkeni Prasanak

Tur Ngamolihang Papasih

Ida Dalem Sida Karya

Sampun Puput Rikang Karya

Mapapasih  Kayu Manis

Kadadosang

Manyengguh Taru Madura

XII. GINADA

1.    Buta Rareangon Pinda

Sedahan Sarwa Baksa Yukti

Mamuktiang Tetadahan

Kawenang Kasupat Antuk

Tirtani Budha Gocara

Maka Pasuci

Mangda Yadnya Sidakarya

2.    Indik Tirta Buda Gocara

Taler Dados Kapesengin

Tirta Pingit Sida Karya

Mwah Tirta Amreta Agung

Sangkan Pingit Lemah Nika

Keharanin

Pajagatan  Sida Karya

3.    Brahmana Keling Sayaga

Mawali Ke Tanah Jawi

Mangalih Margi Utama

Sagara Rupek Katuju

Mangkana Salampah Ida

Brahmana Keling

Maring Bali Dwipayana

4.   Amunika Mangaturang

Managingin Gita Santi

Gurit Brahmana Kalingga

Ampurayang Kirang Langkung

Sakadi  Cangkah Cumangkah

Parama Santi

Anggen Titiang Nguntatang

Om Santi, Santi, Santi, Om

Puput  Kepipil, Tanggal 18 Juni 2015,

Waraspati Wariga. Pukul 21.00  Wita,

Olih Ir. Putu Januar Ardhana,

Alamat Banjar Batur Sari

Denpasar Timur Bali.