GAGURITAN

SUDAMALA SAPULEGER

OLEH

IR. PUTU JANUAR ARDHANA

DENPASAR

2015-06-03

ATUR  PENGAKSAMA

Om Swasti Astu.

Melarapan sangkan nunas ica majeng ring Ida Sang Hyang Widhi Wasa, mewastu Waranugraha beliau titiang prasida mipil gending puniki

Sane anggen titiang bantang cakepan puniki nenten sios, wantah indik carita kawentenan Panglukatan Sudamala Ring Bali

Cakepan puniki wantah anggen titiang panuntun, waluya titi pengancan alit-alit titiang, raris karantus anggen titiang gaguritan. Dening asapunika janten katah sane tan manut sekadi sane wenten ring indik-indik sastra.

Inggih kadi asapunika atur pengaksama titiang majeng ring sang sujana mogi-mogi sareng sami ngemanggihang sekadi sane kemanahang sowang-sowang. Dumogi Ida Sanghyang Saraswati setata melingga ring sikian sareng sami.

Om santi Santi Santi Om.

                                                Denpasar, 03 Juni 2015

                                                Penulis

                                                Ir. Putu Januar Ardhana

                                   

DAGING CAKEPAN

Atur Pengaksama                                                   Hal

  1. Durma .............................................              1

  2. Dangdang  ........................................             2

  3. Adri     ..............................................               3

  4. Sinom   .............................................              4

  5. Ginanti  ............................................              6

  6. Ginada .............................................              7

  7. Saram Dahana .................................               8

  8. Pangkur.............................................              8

  9. Pucung ..............................................             9

10. Maskumambang  ..............................              10

11. Ginada ..............................................             11

G A G U R I T A N

SUDA MALA SAPUH LEGER

OM SWASTI ASTU

I.                  SINOM

1.  Malinggih Ring Siwadwara

Sang Hyang Aji Saraswati

Dumadak Ratu Malingga

Mangdane Presida Malih

Ngicalang Sekancan Dekil

Pari Polah Jadma Dudu

Tuna Pratiaksa Sastra

Aji Purana Niti

Sugra Ratu

Manah Nunas Kanti Bela 

2.   Pinake Anggen Panyelag

Mekarya Gending Puniki

Ngatur Ayah Maguritan

Antuk Tambet Ngalintangin

Kasilibang Antuk Gending

Kadi Pantun Keni Blabur

Padalingsa Tuna Lintang

Paribasa Bolak Balik

Nenten Manut

Ugering Pasang Aksara

II. DURMA

1.   Kacarita Wenten Pandita Utama

Bagawan Bregu Siniwi

Jenek Ring Bregu Asrama

Putra Kalih Istri Lanang

Sane Istri Diah Adnyawati

Putra Lanang  

Sang Barata Lwih Apekik

2.   Sane Mangkin Sang Barata  Kakebekan

Eling Ring Ragane Sisip

Wireh Dina Pamedalan

Kajeng  Kliwon Saniscara

Wuku Wayang Duk Puniki

Tan Buungan

Katadah Hyang  Kala Sakti

3.   Kocap Wenten Panugrahan Sanghyang Siwa

Majeng   Sanghyang Kala Nguni

Sane Dados Tetadahan

Jadma Embas Uku Wayang

Batara  Kala Gumanti

Wenang Nadah

Apan Mamada  Hyang Kala

III.  DANGDANG GULA

1.   Sang Suda  Kaparisuda Yukti

Mawinan  Mapungkus Suda Mala

Kalukat Olih Pranah Ajine

Ida Hyang Bagawan Bregu

Nanging Tan Urung Kapetik

Antuk Ida Sanghyang  Kala

Apan Sang Suda Jatiniku

Durung Polih Nunas Tirta

Panglukatan Sapuh Leger Kawastanin

Olih Dane  Jero Dalang

2.  Kacrita Hyang Kala  Sane Mangkin

Manyujur Genah  Sang Suda Mala

Sanghyang Kala Lintang Gasek                  

Manyaratang Jaga Ngejuk 

Kaja Kelod Kauh  Kangin

Palaib Sang Suda Mala  

Urine Nerus Katutut

Olih Ida Sanghyang Kala

Wenten  Sisan Yadnya Dados  Dugdugan Mis

Irika  Mengkeb Sang Suda  

IV.    ADRI

1.   Ida Sanghyang Kala Dahat Bingung

Mangandika  Bangras

Kija Sang Suda Malaib

Mare  Dini Srayang Sruyung

Klimpang Klimpeng Clingak Clinguk

Sagetan   Sube Makleset

Tongosnyane Sube Suung

Hyang Kala Manyingadwala

Manah Brangti  Jengah Erang 

2.   Batara Kala Ngebitang Luwu

Ngrereh   Suda Mala

Sabilang Luwu Kakebit

Ditu  Sang Suda Malingkuh

Malih   Mumbul Tur Malayu

Pati Kaplug Srandang Srendeng

Tolah Tolih Srayang Sruyung

Mangda Nenten Kakeniang

Antuk Ida Sanghyang  Kala

3.   Batara Kala Gelis Mangetut

Sinambi Mangucap

Maduluran Manah  Brangti

Gelis Ngamedalang Pastu

Jadmane  Nugdugang  Luwu

Apang Tusing Sida Gawe

Pradene  Munduhang Luwu

Patut Enggalang Entungang

Apang Tan Kacakrabawa

V.    SINOM

1.   Sedek  Malaib  Sang Suda

Ring Margi Wenten Kapanggih

Wang Karya Atiwa Tiwa

Irika Ida Mangepil

Maring  Tugelan Tiingi

Sane Tan  Madaging Buku

Sisan-Sisan  Ngarya Wadah

Batara Kala Mangaksi

Kadi Gepu

Sang Kala Nakep  Sang Suda

2.   Nanging Gelis Sang Barata

Mlecat  Saking Song Tiingi

Apan Bolong Makaruwa

Mawinan Polih  Malaib

Hyang Kala Kaliwat Brangti

Mawinan Ngetelang Pastu

Apang Bingung Dane  Tukang

Yen Numanang Sisan Tiying

Tan Mabuku

Sisine  Bolong Dadua

3.   Tatkala  Surup Hyang Surya

Wengi Rawuh Manampekin

Sedeng Wenten Mangku Dalang

Ngawitin Wawu Magending

Sang Suda Mengkeb Digelis

Kabungbung Gender Mangesul

Kesyab  Ida Sanghyang  Kala

Sang Suda Sampun Kapanggih

Yan Macemplung

Maring  Bungbung Gender Wayang

4.   Jero Mangku Dalang Munggah

Suar Kagantung  Kaenyit

Gender Wayang  Katabuhang

Pangendang Surya Kakawit

Dalang Nabdabang Malinggih

Tur Nuturang Abah Lampu

Gedong Miwah Kelir Wayang

Sakropak  Wayang Maukir

Tiaga Puput

Maring Samping  Jero Dalang

VI.  GINANTI

1.   Sang  Dalang Wawu Malungguh

Sanghyang  Kala Manangsekin

Manakenin  Mangku Dalang

Jero Dalang  Dadi Bani

Enyen  Ngicen Panugrahan

Darma Pawayangan  Niki

2.   Yaning Jero Nenten Manut

Dalang Pacang Tadah Jani

Hulun Iki  Sanghyang Kala

Jero Mangku Dalang Nyawis

Nimbal Matur Saha Sembah

Swasti Astu Namastuti

3.   Hyang  Kala Palungguh Ratu

Mina Kadi Tiang Bani

Sangkaning Sanghyang Iswara

Ngicen Sakancan  Pamargi

Samaliha Tiang Tatas 

Darma Pawayangan Yukti

4.   Batara  Malih Manandruh

Majeng  Mangku  Dalang Gelis

Nah Indayang Pidartayang

Pakakas Jerone Sami

Napi Saluwir  Punika

Mangku Dalang Matur Malih

5.   Suar Wayang  Sanghyang Surya

Mawinan Galang Sinangling

Gadebong Pinaka Tanah

Kelir  Hyang Embang Gumanti

Katengkong Meme Lan Bapa

Sane Ngicen  Tiang Urip

           

VII. GINADA

1.   Paman Mangku Dalang Wayang

Dadi  Gender Patpat Warni

Ngudiang Tusing Dadua

Malih Wenten  Tanya  Runtuh

Saking Ida Sanghyang Kala

Raris Nyawis

Jero Mangku Dalang Wayang

2.   Indik Ngangge Gender  Patpat

Ampurayang Matur Sisip

Nika Nyama Sane Patpat

Anggapati Pinih Duwur

Merajapati  Andapan

Banaspati

Sareng  Banas Pati Raja

3.   Uduh Paman Mangku Dalang

Paman Mula Sajeroning

Dalang Dahat Mautama

Jani Ulun Tatan Tulus

Nadah Kawentenan Dalang

Sawateking

Tatas  Darma Pawayangan

VIII. SAMARADAHANA

1.   Duk Rahinane Puniki

Wusan Ida Sanghyang  Kala

Ngulgul Mangku Dalang Kawot

Mawali   Batara Kala

Ngarereh Sang Suda Mala

Dengak Dengok Tan Kapangguh

Panyingakane Mangemang

2.   Wayang Sampun Puput Mangkin

Malaib Malih Sang Suda  

Batara Kala Kadropon

Ngetut Palaib Sang Suda

Sang Suda Sampun Magenah

Maring  Gesinge Macebur

Sane Samah Kabinawa

IX.  PANGKUR

1.   Kocapan  Wenten Sang Nata

Keabiseka  Ring Jagat  Mayaspati

Arjuna Sahasra Bahu

Parab  Idane  Kaloktah

Mangkin  Kacarita Sedek Tangkil Matur

Arin Dane  Suda Mala

Mapesengan  Adnyawati

2    Inggih Ratu Prabu Nata

Titiang Mapasengan Diah Adnyawati

Belin Titiang Sedeng Sungsut

Maparab Sang Suda Mala

Kaputra Antuk Ida Bagawan Breghu.

Wenten Umatur Amatra

Majeng Ratu Sane Sakti

3.   Kacawis Antuk Sang Nata

Dewa Sang Listuhayu Diah Adnyawati

Mai Pahekan Kadulu

Napi  Ngawinang Idewa

Napi Wenten  Kadi Pranagata Rawuh

Sane Kauleng Ring Manah

Durus Nikayang Digelis

X.   PUCUNG

1.   Sang Diah Adnyawati Digelis  Umatur

Ratu Sang Nata

Mawinan Titiang Manangkil

Jaga Nglungsur

Sraya Kanti Bela Krama

2.   Ratu  Prabu Arjuna Sahasra Bahu

Belin  Titiang

Sang Suda  Mala Inapti

Lekad Ipun

Saniscara Pon Wuku Wayang

3.   Sampun Kalukat Olih Bagawan Bregu

Kantun Jaga Katadah

Sanghyang Kala Mangintilin

Sang Suda Kantun

Ring Punyan Tiingi Samah

4.   Pinunas Titiang Mangda Cokor I Ratu

Ledang Nyedayang

Sanghyang  Kala  Sane Jengis

Nenten Durus

Manadah Sang Suda Mala

5.   Yan Sampun Sanghyang Kala Seda Katempur

Pinaka Tebusan

Pacang  Misadia Ngayahin 

Majeng  I Ratu

Dados Rabi Prabu Nata

XI.  MASKUMAMBANG

1.   Riwawu Samangkana  Diah Adnyawati

Suka Sang Sahasra

Mapikayun Jaga Masmi

Ida Hyang Batara  Kala

2.   Sapunika Atur Diah Adnyawati

Sang Nata Kasukan

Nabdabang Mayuda Gelis

Mademang Batara Kala

XII. GINADA

1.   Hyang  Kala Masinganada

Mangarepang Manyagjagin

Sahasra Bahu Manyadang

Sampun Kasuwen Mabarung

Kalilih Batara Kala

Kapatitis

Kantan Ida Antuk Panah

2.   Risampun Padem Hyang Kala

Sahasra Bahu Nibenin

Tiang Jani  Nyupat Dewa

Ngicen Dewa Lungguh

Bucu Kaja Kauh Magenah

Jenek Linggih

Manados Panunggun Karang

3.   Amunika Mangaturang

Managingin Gita Santi

Gaguritan Sudamala

Ampurayang Kirang Langkung

Purun Cangkah Cumangkah

Parama Santi

Anggen Titiang Nguntatang

Puput  Kepipil, Tanggal 3 Juni 2015, Budha Tolu. Pukul 10.37  Wita, Olih Ir. Putu Januar Ardhana, Alamat Banjar Batur Sari Denpasar Timur Bali.